எழுத்தறிவித்தவன் இறைவன் ஆவான். ஆசிரியர் சேவை என்பது இறை சக்திக்கு நிகராகப் போற்றப்பட்டு வருகின்றது. அந்த வகையில் 33 வருடங்கள் ஆசிரிய சேவையை வழங்கி நிறைவாக பூர்த்தி செய்து ஓய்வு பெறுகின்ற விஞ்ஞான பாட ஆசிரியை திருமதி சயந்தி கருணாகரன் அவர்களை வாழ்த்தி இச்செய்தியினை வழங்குவதில் அகமகிழ்ந்து கொள்கின்றேன் மாணவனை வேலை உலகிற்கு ஆற்றுப் படுத்துவதில் விஞ்ஞான பாடத்திற்கு முக்கிய பங்கு உண்டு ஆசிரியர் விஞ்ஞான பாடத்தை திறம்பட கற்பித்து சிறந்ததொரு மாணவ சமுதாயத்தை உருவாக்கியுள்ளார்

Covid-19 நோய் நிலைகளின் காரணமாக கல்வி முன்னெடுத்தல் திட்டத்தில் ஏற்பட்டுள்ள மாற்றங்களுடன் பாடசாலை தொடர்ந்தும் செயற்படவேண்டிய தேவைபாட்டில் உள்ளது. இவை தொடர்பான திட்டமிடல்களை ஆசிரியர்களினதும் , மாணவர்களினதும் ஒத்துழைப்புடன் கல்லூரி முன்னெடுத்துச் செல்கின்றது. இன்றைய தினம் மாணவர்களது கல்வி நடவடிக்கையின் முன்னேற்றம் குறித்து வினவுகின்ற வகையில் தந்தை செல்வா அரங்கில்சமூக இடைவெளியை பேணி மாணவர்களுடன் கல்லூரி முதல்வர் கலந்துரையாடினார்.

தனக்கே உரித்தான பண்பாட்டு மரபுரிமைகளுடன் தமிழர் பண்பாடுகளில் அறிவியல் சார்ந்த நோக்கை முதன்மைப்படுத்தும் யாழ்ப்பாணம் மத்திய கல்லூரி, வருடாந்தம் உழவர் திருநாளாம் தைப்பொங்கலை மகிழ்ச்சியுடன் கொண்டாடுவது மரபு. அதன்பால் 2021 ஆம் ஆண்டு மனமகிழ்ச்சிக்கான மாற்றத்தை உலகம் முழுவதும் எதிர்பார்த்துக் கொண்டிருக்கின்ற இக்காலகட்டத்தில் விவசாயத்தின் உன்னத பெறுமானத்தையும், மன மகிழ்ச்சியையும் மாணவர்களினூடாக சமூகத்திற்கு எடுத்துச் செல்லும் நோக்குடன் பொங்கல் விழாவினை மத்திய கல்லூரிஅழகாக சிறப்பித்துக் கொண்டிருக்கின்றது.