“சாதனையாளரான விஜயகாந்த் வியாஸ்காந்த்தின் கௌரவிப்பு விழா”

மத்திய கல்லூரியின் விளையாட்டுத் துறை சார்ந்த இலக்குகளை சாதனைகளாக மாற்றுகின்ற மாணவர்களை கௌரவித்து வாழ்த்துவதன் மூலம் மேலும் சாதனை வீரரை உற்சாகப்படுத்துவதோடு தொடர்ந்து முனைப்போடு இயங்குகின்ற ஏனைய மாணவர்களையும் சாதனையாளர்களாக மாற்றுகின்ற தூண்டலை மத்திய கல்லூரி சிறப்பாக முன்னெடுக்கின்றது.

சர்வதேச கிரிக்கெட் அரங்கில் கால் பதித்து தனது திறனை வெளிப்படுத்திய செல்வன்.விஜயகாந்த் வியாஸ்காந்த் அவர்ளையும் அவரது பெற்றோர்களையும் கௌரவித்து வாழ்த்துவதற்காக எமது கல்லூரி இன்று விழாக்கோலம் பூண்டது.

கல்லூரியின் முதல்வர் கலாநிதி எஸ் கே எழில்வேந்தன் அவர்களின் தலைமையில் இடம்பெற்ற இவ்விழாவிற்கு, அதி வணக்கத்துக்குரிய பேராயர் கலாநிதி டானியல் தியாகராஜா (பழைய மாணவர், துடுப்பாட்ட வீரர், ஹாக்கி கூடைப்பந்து அணி வீரர்) அவர்களும்

“சமூக ஜோதி” திருவாளர் வாமதேவா தியாகேந்திரன் ( பழைய மாணவர், சமூக சேவையாளர், தியாகிகள் அறக்கொடை நிலையத்தின் ஸ்தாபகர், ஹொக்கி காற்பந்து அணி வீரர் மற்றும் அணித்தலைவர்)  அவர்களும் பிரதம அதிதிகளாக கலந்து கொண்டதுடன்  கடந்த வருடங்களில் வடக்கின் பெரும்போர் என்று வர்ணிக்கப்படுகின்ற (Big Match) ற்கு அனுசரணை வழங்கிய Mobitel  நிறுவனத்தின் சார்பாக யாழ் பிராந்திய முகாமையாளர் திரு கே லக்ஷன் அசேல அவர்களும் பிராந்திய அபிவிருத்தி நிர்வாகி திரு என் விஜிகாந்தன் அவர்களும் அதிதிகளாக கலந்து சிறப்பித்து வாழ்த்துக்களை தெரிவித்துக் கொண்டனர்.

கல்லூரி முதல்வரின் தலைமை உரையின்போது , யாழ்ப்பாணம் மத்திய கல்லூரி எமது மாணவர்களுக்கு விளையாட்டுத் திறனை உச்ச அளவில் பெற்றுக்கொள்வதற்கு அனைத்து வசதிகளையும் தரமான முறையில் செய்து கொடுத்துள்ளது. குறிப்பாக செல்வன் வியாஸ்காந்த்  கடந்த 7 ஆண்டுகளாக பாடசாலையின் தலைசிறந்த பயிற்றுவிப்பாளர்களால் பயிற்றுவிக்கப்பட்டதுடன் இலங்கை முழுவதும் பிரபல பாடசாலை அணிகளுடன் விளையாடி பயிற்சியையும் பெறுமதியான அனுபவத்தையும் பெற்றுக்கொண்டுள்ளார். எம்முடைய விளையாட்டுத்துறையின் சகல மாணவர்களையும் ஒரே பார்வையுடன் சமமான வசதி வாய்ப்புக்களை ஏற்படுத்திக் கொடுத்தாலும் விடாமுயற்சியும் தனித்திறனும் உள்ள மாணவர்கள் கிடைக்கின்ற சந்தர்ப்பங்களை வினைத்திறனுடன் பயன்படுத்தி இதுபோன்ற சாதனைகளை நிகழ்த்துகின்றனர் என்று கூறியதுடன் தொடர்ந்தும் கிரிக்கெட் விளையாட்டின் சாதனையாளர்களை அதிகரிக்க வேண்டுமாயின் எம்முடைய கிரிக்கெட் விளையாட்டு திடலில் பெறும் பயிற்சி நெறியுடன் மேலதிகமாக கிரிக்கெட் விளையாட்டுக்கு உரித்தான தரையில் (Turf) பயிற்சிகளை பெற்றுக்கொள்வார்களாக  இருந்தால் அதிகப்படியான வியாஸ்காந்த் போன்ற சாதனையாளர்கள் இக்கல்லூரியில் உருவாக்கப்படுவார்கள் என்று கூறியதுடன் தொடர்ந்தும் அவருடைய வெற்றி பயணம் உலக அரங்கில் பிரகாசிக்க வாழ்த்துக்களையும் தெரிவித்துக் கொண்டார்.